बुटवल :-बुटवलका यात्रुहरूलाई लक्षित गर्दै पश्चिम नेपाल बस व्यवसायी प्रा.लि.ले बुटवलबाट तिलोत्तमा र भैरहवा हुँदै लुम्बिनीसम्म सिधा बस सेवा सुरु गरेको छ। गोलपार्कबाट दैनिक बिहान ८ः१५ बजे बस छुट्ने व्यवस्था गरिएको छ।
बस व्यवसायी प्रा.लि.का बुटवल-भैरहवा रुट संयोजक सूर्यप्रकाश ढुंगानाका अनुसार यो सेवा यात्रुहरूको सुविधा र पर्यटन प्रवर्द्धनको उद्देश्यले सुरु गरिएको हो। “हामीले सिधा बस सञ्चालन गर्न थालेका छौं। यात्रुहरूले गोलपार्कबाट लुम्बिनी लेखिएको गाडीमा चढ्न सक्नुहुनेछ। राजमार्ग चौराहाबाट साढे ८ बजे गाडी पर्खिन सकिनेछ,” ढुंगानाले बताए।
लुम्बिनीबाट फर्कने तालिका
लुम्बिनीबाट बुटवल फर्कनका लागि बिहान ११ बजे र दिउँसो ४ बजे बस छुट्ने छ। प्रारम्भमा कार्यालय समयलाई ध्यानमा राखेर यो सेवा सुरु गरिएको हो। “यात्रुहरूको माग बढ्दै गयो भने भविष्यमा पर्यटनमैत्री गाडी थप गरिनेछ,” ढुंगानाले जानकारी दिए।
पर्यटन प्रवर्द्धनमा सहयोग
बुद्धजन्मस्थल लुम्बिनी क्षेत्रको धार्मिक र सांस्कृतिक महत्त्वलाई ध्यानमा राख्दै यो सेवा सुरु गरिएको हो। स्थानीय यात्रुहरूका साथै विदेशी पर्यटकका लागि पनि यो सेवा लाभदायक हुनेछ। बुटवलदेखि लुम्बिनीसम्मको यात्रा सहज, छिटो र सुरक्षित बनाउन यो कदमले महत्त्वपूर्ण योगदान दिने विश्वास गरिएको छ।
यात्रुहरूका लागि सूचना
यात्रुहरूले गोलपार्कबाट सिधा गन्तव्यतर्फ जान “लुम्बिनी” लेखिएको गाडीमा यात्रा गर्न सक्नेछन्। तिलोत्तमा क्षेत्रका यात्रुहरूले राजमार्ग चौराहामा गाडी पर्खन सक्ने व्यवस्था गरिएको छ।
पश्चिम नेपाल बस व्यवसायी प्रा.लि.ले यात्रुहरूको सुविधाका लागि गुणस्तरीय सेवा दिन निरन्तर प्रयास गरिरहेको र आवश्यकता अनुसार थप सुविधा थप्ने योजना रहेको बताएको छ।
(यो रिपोर्टर: सुदीप ज्ञवाली)
